გოგონა დაიბადა

„გოგოა!“ – ამ ახალ ამბავს ზოგან სიხარულით ხვდებიან, ზოგან – არც იმდენად, მაგრამ არ აქვს მნიშვნელობა პირველ რეაქციას, ცხოვრების შემდეგ ეტაპებზე გოგოებს მაინც ათასნაირი სირთულე, დამცირება, უგულებელყოფა, არასერიოზული დამოკიდებულება, შეურაცხყოფა გვხვდება მხოლოდ იმიტომ, რომ გოგოები ვართ და ჩვენ ან „არ გვეკადრება“, ან „არ შეგვიძლია“, ან „არ ვიმსახურებთ“, ანაც „ყველაფერს ავიტანთ“.

რამდენიმე თვის წინ, გაეროს მოსახლეობის ფონდის (UNFPA) საქართველოს ოფისის ინიციატივით, ფოტოგრაფმა დინა ოგანოვამ ფოტოგამოფენა სწორედ იმ მიზნით მოამზადა, რომ კიდევ ერთხელ შეეხსენებინა ჩვენთვის: საქართველოში დღემდე ფესვგადგმულია გენდერული ნიშნით სქესის შერჩევის პრაქტიკა, რომელიც მთელ საზოგადოებას აყენებს ზიანს. ფოტოპროექტისთვის „გოგონა დაიბადა“ დინა ოგანოვამ თბილისსა და კახეთში მცხოვრები ოჯახები შეკრიბა. ეს ის მშობლები აღმოჩნდნენ, რომლებსაც, თავიანთი სოციალური და ეთნიკური წარმომავლობისა და კულტურული ღირებულებების მიუხედავად, გოგო შვილების ყოლა ახარებთ, მათ წინსვლაზე, განათლებასა და ბედნიერებაზე ზრუნავენ.