გიორგი მაისურაძე - საქართველომ საკუთარ თავს გამოუცხადა ომი

გიორგი მაისურაძე, ფილოსოფოსი

როდის იბადება ქართული საბჭოთა ნაციონალური ნარატივი? რა ნიშნები აქვს და რით განსხვავდება საბჭოთა პირველი რესპუბლიკის დროინდელისაგან?

ქართული საბჭოთა პერიოდის ნაციონალური ნარატივის გაჩენა პირდაპირ კავშირშია საბჭოთა ეროვნულ პოლიტიკასთან, რომელიც იწყება ერთი ძალიან მნიშვნელოვანი მოვლენით – ესაა 1923 წელს საბჭოთა კავშირის ადმინისტრაციულ-ტერიტორიული დაყოფა და ის პოლიტიკა, რომელსაც ბოლშევიკურმა მთავრობამ დაარქვა „კორენიზაცია“ (პირობითად შეიძლება ითარგმნოს, როგორც „განფესვა“). ის განსაზღვრავდა, სხვადასხვა ეთნოსი განვითარების რომელ საფეხურზე იმყოფებოდა და ერის რა ნიშნებს ატარებდა. რა თქმა უნდა, არსებობდა „კორენიზაციის“ თეორიული საფუძველი, ეს იყო სტალინის 1913 წელს დაწერილი თხზულება – „მარქსიზმი და ნაციონალური საკითხი“.

1917-1923 წლებში სტალინი ეროვნულ საქმეთა სახალხო კომისარი იყო და მნიშვნელოვანი სიტყვა ეთქმოდა ამ სფეროში. კორენიზაციის მიხედვით განისაზღვრა, რომელ ქვეყანას ექნებოდა მოკავშირე რესპუბლიკის ს