ახალი დრო, იდეები, ადამიანები.
EN

ლიკა ჭკუასელი Dia Art Foundation -ის შესახებ

ლიკა ჭკუასელი, 29 წლის, არტკონსულტანტი

პროფესია არტკონსულტანტი ერთგვარი ხიდია არტისტებსა და ხელოვნებით დაინტერესებულ ადამიანებს შორის. არტკონსულტანტი არ მუშაობს კონკრეტულ მხატვრებზე და კლიენტს სთავაზობს ნამუშევრებს როგორც სხვადასხვა გალერეიდან, ისე პირდაპირ მხატვრის სახელოსნოდან. ამიტომ ის ხელს უწყობს როგორც არტისტების, ასევე გალერეების საქმიანობას. კონსულტაციას უწევს ხელოვნების კერძო და კორპორატიულ კოლექციონერებს მხატვრებისა და ნამუშევრების შერჩევასა და სრულყოფილი, მნიშვნელოვანი, საინტერესო კოლექციის შექმნაში.

დიდი იდეა: რაც უნდა ბანალურად ჟღერდეს: ინტერნეტი, ინტერნეტი, ინტერნეტი.

დიდხანს ვფიქრობდი, ვინ შეიძლებოდა ყოფილიყო ადამიანი, ვის იდეებსაც ვიზიარებ და ვინც ჩემი ინსპირაციაა. ერთი ადამიანის შერჩევა წარმოუდგენელი აღმოჩნდა, რადგან ასეთი ძალიან ბევრია, ამიტომ გადავწყვიტე, ადამიანების გუნდზე დამეწერა, მათზე, ვისაც Dia Art Foundation-ი აერთიანებს.

სახელი „დია“ ბერძნულია და ქართულად ნიშნავს: მეშვეობით, დახმარებით. ფონდი ნიუ იორკში, 1974 წელს დაარსდა და ზუსტად მისი მეშვეობით, ხელოვნებისა და არტისტების სულ სხვაგვარი ხელშეწყობის მაგალითი გაჩნდა მსოფლიოში. Dia Art Foundation-მა არტისტებს შესთავაზა უზარმაზარი სივრცე, სადაც ყველაზე მასშტაბური, დიდი ზომის ნამუშევრების შექმნა და გამოფენა იყო შესაძლებელი და უზრუნველყო ფინანსებითაც, ყველაზე წარმოუდგენელი, გიჟური იდეები მხატვრებს რეალობად რომ ექციათ. რომ არა ეს ფონდი, იოსეფ ბოისი ვერ შეასრულებდა თავის გრანდიოზულ ჩანაფიქრს – დაერგო 7 ათასი მუხა შვიდი წლის განმავლობაში კასელში. ბოისის ეს არტპროექტი თავისი ეკოლოგიური სიმბოლიკით დღეს რეალობაა. ასეთივე წარმოუდგენელი იყო სკულპტორ უალტერ დე მარიას „ელვის მინდვრის“ რეალობად ქცევა – თუმცა „დიას“ შეკვეთით ნიუ მექსიკოს უდაბნოში ეს ულამაზესი ინსტალაცია უკვე წლებია, შთამბეჭდავ სანახაობას ქმნის. Dia:Beacon-ის კოლექციაში ასევე დაცულია დენ ფლევინის, დონალდ ჯადის, აგნეს მარტინის, რიჩარდ სერას, სოლ ლევიტის და სხვა მრავალი არტისტის ნამუშევარი. ანუ „დია“ ფინანსებს, სამუშაო და საგამოფენო სივრცეს და, ამ ყველაფერთან ერთად, რაც ყველაზე მნიშვნელოვანია – სრულ თავისუფლებას უამრავ სხვა არტისტს აძლევს.

Dia Art Foundation-ი ყოფილი ქარხნის შენობაშია განთავსებული და მიუხედავად იმისა, რომ ამ ფონდმა ერთ-ერთმა პირველმა გარდაქმნა ინდუსტრიული შენობა სახელოვნებო სივრცედ, გასაკვირი დღეს ამაში აღარაფერია. გასაკვირი და, მეტიც, შთამაგონებელი, ხელოვნების სრულიად უნიკალური ხედვაა; შესაძლებლობების არეალის გაჩენა და განათლების შანსის მიცემა.

2003 წლიდან Dia Art Foundation-ის მუზეუმიც მოქმედებს. მას შემდეგ, რაც ნიუ იორკიდან საათ-ნახევრის სავალზე, მდინარე ჰადსონის ნაპირას, პატარა ქალაქ ბიკონში გახსნილი მუზეუმი ვნახე, „დიას“ იდეებით შეპყრობილი დავდივარ.

„დიას“ სტრუქტურა, კონცეფცია, იდეები, სწორება განათლებასა და თავისუფლებაზე სწორედ ის არის, რაც ჰაერივით სჭირდება ხელოვნებას საქართველოში: ახალგაზრდა მხატვრების ხელშეწყობა, თანამედროვე ხელოვნებაში ინვესტიცია, თბილისსგარეთ სახელოვნებო სივრცეების გაჩენა და ამ გზით რეგიონების განვითარება, მასშტაბური ნამუშევრების შექმნა, თანამედროვე ხელოვნების მუზეუმის გახსნა.

დღეს სახელმწიფო ვერ ან არ იცლის ამ ყველაფრისთვის და ზუსტად ამ დროს საჭიროა გაჩნდეს ინდივიდუალური ინიციატივები, შეიქმნას კერძო და საზოგადოებისთვის ღია კოლექციები.

ამ ღიაობის, მობილურობის, დაუჯერებელი იდეების განხორციელების არეალია ჩემთვის Dia Art Foundation-ი.

ავტორი: ლიკა ჭკუასელი

შენი დახმარებით კიდევ უფრო მეტი მაღალი ხარისხის მასალის შექმნას შევძლებთ გამოწერა