ახალი დრო, იდეები, ადამიანები.
EN

ვახო ვახტანგიშვილი ელონ მასკის შესახებ

Any sufficiently advanced technology is indistinguishable from magic...

ვახო ვახტანგიშვილი, 27 წლის, ციფრული სააგენტო "ლივინგსტონის" აღმასრულებელი დირექტორი, "ჯეოლაბის" თანადამფუძნებელი, მუდმივი აღმოჩენების მოყვარული და ელონ მასკის თანამოაზრე. "ვისურვებდი დღე-ღამეში იყოს ოცდაოთხ საათზე მეტი, რადგან დროის უმეტესი ნაწილი მიაქვს საქმეს, საიდანაც კომპენსაციად ვიღებ მუდმივ სიახლეებსა და მოძრაობას".

დიდი იდეა: მაინც კომპიუტერის შექმნა. ხელოვნური ინტელექტი, რომელიც წამის მეასედებში ითვლის და აანალიზებს იმას, რასაც ბევრი ჭკვიანი ადამიანის რესურსი დასჭირდებოდა. ჰოდა, მგონია, რომ რახან კომპიუტერმა შეძლო ერთი შეხედვით შეუძლებელი, ელონ მასკსაც არ გაუჭირდება ადამიანების მარსზე გაშვება.

ცოტა რამ ელონ მასკზე – თუ ერთხელ მაინც გიფიქრიათ იმაზე, რომ „იდეისთვის თავდადებული ადამიანი“ უბრალოდ პათეტიკური ფრაზაა და სხვა არაფერი, ელონ მასკის ბიოგრაფიას გაეცანით. მასკი არის ადამიანი, რომელსაც აქვს არაერთი “Big Idea” და სჯერა, რომ ყველაფერი გამოუვა. თუ გგონიათ, რომ მარსზე ადამიანების დასახლება უტოპიაა, ისევ მასკის ბიოგრაფიისკენ გადაგამისამართებთ. SpaceX არის კომპანია, რომელიც აპირებს რაკეტის არაერთჯერადი მოხმარების მოდულები შექმნას, ფრენის ხარჯი მინიმუმამდე დაიყვანოს და NASA-ს საშუალება მისცეს ადამიანები მარსზე გაუშვას. მისი წამოწყებაა „ფეიფალი“, რომელიც „იბაიმ“ 1.5 მილიარდ დოლარად შეიძინა. ასევე, მისი ერთ-ერთი პროექტია SolarCity, რომელიც შენობების სახურავებზე მზის ელემენტების უსასყიდლოდ დამონტაჟებას და ელექტროენერგიის ფასის შემცირებას გულისხმობს. მასკი აფინანსებს Tesla Motors-ს და ნამდვილად აპირებს შექმნას უსწრაფესი ტრანსპორტი.

მასკი ჩვენი დროის ჟიულ ვერნია, ვინც არა მარტო მომავლის იდეებსა და კონცეფციებს ქმნის, არამედ ამ ყოველივეს ფიზიკურად აშენებს. როდესაც წარმოუდგენელი სირთულის პრობლემას უპირისპირდები, მასთან გამკლავების გზაც ცალსახად წარმოუდგენელია, რომლისთვისაც ვერ გამოიყენებ იმ ცოდნასა და გამოცდილებას, რაც გაქვს. ყველაფერი უნდა ისწავლო თავიდან, სხვა გზა არ არის. უბრალოდ, უნდა გჯეროდეთ მასკის იმ, ერთი შეხედვით, უტოპიური იდეების, რომელიც მას აქვს და, ასევე, არ დაიწყოთ იმაზე წინასწარ ფიქრი, რა გამოგივათ და რა არა. მე, როგორც ადამიანი, რომელსაც აინტერესებს ტექნოლოგიებით შექმნილი მაგია, ვიტყოდი, რომ ეს ერთგვარი გამოწვევაა, რომელსაც, თუ ერთხელ მიიღებ, ბოლომდე უნდა მიჰყვე.

P.შ. მე და ელონი – ჩვენ გვჯერა, რომ შეუძლებელი არაფერია, უბრალოდ, უნდა სცადო იმდენჯერ, რამდენჯერაც საჭიროა. ჩვენ გვჯერა, რომ ადამიანს მარსზე დიდი მომავალი აქვს. ჩვენ გვჯერა, რომ თუ საჭიროა, კვირაში ასი საათი უნდა იმუშაო. ჩვენ გვჯერა, რომ ის, რასაც ვაკეთებთ, სამყაროს მომავალია. 

შენი დახმარებით კიდევ უფრო მეტი მაღალი ხარისხის მასალის შექმნას შევძლებთ გამოწერა