კორდონი | მარიამ ჯაჭვაძე

ინტერვიუ 2013 წლის 17 მაისის კონტრაქციის მონაწილესთან.


მე პოლიტიკურად მოტივირებულ ოჯახში გავიზარდე, ბიძაჩემი ჯერ კიდევ 1988 წელს ეროვნული მოძრაობის წევრი იყო, პირველად რომ საშიმშილოდ გამოვიდნენ, იქ იყო. 9 აპრილი გამოიარა… ბავშვობიდან სულ პატრიოტული სულისკვეთებით ვიზრდებოდი…

17 მაისის დილას აქციაზე გავედი... ფეისბუკიდან გავიგე, აქციის ორგანიზატორები ჩემი მეგობრები იყვნენ. ვიცოდი, რა იყო დაგეგმილი რუსთაველის გამზირზე 17 მაისს და წავედი გამიზნულად, გასაპროტესტებლად. მარტო წავედი, მაგრამ ბევრი ახლობელი და ნაცნობი შემხვდა.

თან კარგი ამინდი იყო. თბილოდა. ძირითადად, თბილისიდან იყვნენ გამოსულები. რეგიონიდან ხალხი იმ დღეს არ ყოფილა. თბილისში კიდევ, როგორც ხდება ხოლმე, ყველა ყველას იცნობს და ერთმანეთს ხვდებოდნენ, ელაპარაკებოდნენ…

თავისუფლების მოედანზე, ტაბიძის კუთხეში, ძველი თბილისის გამგეობა იყო, მიწისქვეშა გადასასვლელთან ვიდექი. აქცია მშვიდობიანად მიდიოდა, მეორე მხარე პუშკინის სკვერში იდგა თავისთვის.